नागपूर:- क्रीडा विश्वात अनेक प्रकारच्या खेळांची परंपरा जपण्याच्या तसेच शारीरिक व मानसिक आरोग्य सुदृढ ठेवण्याच्या उद्देशाने विविध विभागातर्फे विभागीय क्रीडा स्पर्धांचे आयोजन होत असते. या विभागीय क्रीडा स्पर्धा पुढे राज्य व राष्ट्रीय स्तरापर्यंत आयोजित केले जातात. याच क्रीडा स्पर्धांचे वैविध्य टिकवताना वन विभागातर्फे राष्ट्रीय क्रीडा स्पर्धाचे आयोजन (दि. 12 ते 16 नोव्हेंबर) दरम्यान देहरादून येथे करण्यात आले.
28 व्या ऑल इंडिया फॉरेस्ट स्पोर्ट्स मीट 2025 मध्ये भारतातील 36 राज्यांनी विविध स्पर्धेत सहभाग नोंदवला होता. त्यामध्ये महाराष्ट्राकडून 50 वर्ष वरील गटात गोंदिया जिल्ह्यातील नवेगाव बांध येथील वनपरिक्षेत्र अधिकारी(प्रादेशिक)सदाशिव अवगान यांची सायकल स्पर्धेत महाराष्ट्र राज्य संघाकडून निवड करण्यात आली होती. या संधीचे सोने करण्याच्या उद्देशाने मैदानात उतरलेल्या सदाशिव अवगान यांनी फक्त एक तास 28 मिनिटात 40 किलोमीटर अंतर कापून प्रथम क्रमांक पटकावला व महाराष्ट्र राज्य संघासाठी सुवर्णपदकाची कमाई केली.
तसेच त्यांच्याच कार्यक्षेत्रात वनरक्षक म्हणून कार्यरत असलेली मंगला खोब्रागडे हिने महिला खुल्या प्रवर्गातून 25 किलोमीटर सायकल स्पर्धेत रोप्य पदक मिळवून महाराष्ट्राच्या शिरपेचात मानाचा तुरा रोवला. या स्पर्धेत दैदीप्यमान कामगिरी केल्याबद्दल गोंदिया वनविभागाचे उपवनसंरक्षक पवन कुमार जोंग तसेच प्रकास्था निष्कसण अधिकारी(एसीएफ) अविनाश मेश्राम यांनी पदक विजेत्या अधिकाऱ्यांचे भरभरून कौतुक केले.
