देवरी :- तालुक्यातील सालेकसा पोलीस ठाणे हद्दीतील ग्राम पुराडा येथे दि. ०५ ऑक्टोबर २०२५ रोज रविवारच्या सायं. अंदाजे ८:०० वाजे दरम्यान शेत शिवारात असलेल्या गदाई बोटीतील पाण्यात तीन तरुणांचा बुडून करून अंत झाल्याने, ग्राम पुराडा तसेच परिसरात हळहळ व्यक्त केल्या जात आहे. आदित्य सुनील बैस( वय १५), तुषार मनोज राऊत (वय १७) दोन्ही राहणार गडेवारटोला/पुराडा तसेच अभिषेक रामचरण आचले (वय २१) रा. पुराडा असे मृतक तरुणांचे नाव आहे.मिळालेल्या माहितीनुसार, गावात राहणाऱ्या आचले कुटुंबात मुलीच्या साखरपुडा चा कार्यक्रम होता. या कार्यक्रमाला सायंकाळच्या सुमारास गावकरी तसेच मित्रमंडळी या बरोबर जेवण करायला आले होते. जेवण झाल्यावर देश माता परिसरात तिघेही दुचाकीने फिरत असताना गावकऱ्यांना दिसले. इकडे कार्यक्रम आटोपल्यावर मृतक लवकर घरी न पोहोचल्याने कुटुंबातील व्यक्तींनी यांचा शोध सुरू केला. दरम्यान पुराडा शेतशिवारात असलेल्या गदाई बोडीनजीक यांची दुचाकी आढळली. बोडीजवळ जाऊन पाहणी केली असता, पाण्याच्या किनाऱ्यावर छत्री व मृतकांचे चप्पल आढळून आले. याची माहिती गावात होताच, गावकऱ्यांनी बोडीकडे धाव घेतली. आणि रात्री अंदाजे १:०० वाजे दरम्यान मृतकांचे शव पाण्याबाहेर काढण्यात आले.घटनेची माहिती सालेकसा पोलीस स्टेशन येथे देण्यात आली असून मृतकांना शवविच्छेदनाकरिता ग्रामीण रुग्णालय देवरी येथे पाठविण्यात आले. पुढील तपास सालेकसा पोलीस करीत आहे. या घटनेने परिसरात शोककळा पसरली आहे.
