गोंदिया/तिरोडा :- मोबाईलचे चार्ज करणे किती धोकादायक ठरू शकते व ते करत असताना किती जास्त सावधानता बाळगावी अन्यथा काय घडू शकते या प्रक्रियेवर विचार करायला लावणारी घटना संत रविदास वार्ड तिरोडा येथे (दि. 22 सप्टेंबर) रोजी सायंकाळी घडली. या घटनेत मोबाईल चार्ज करत असताना दोन्ही बापलेकांना लागलेला करंट इतका जोरदार होता की काही क्षणातच बापलेकांचा मृत्यू झाला.
यामध्ये मृतक नरेश हरिदास बरईकर वय 50 व दुर्गेश नरेश बरईकर वय 21 वर्षे राहणार संत रविदास वार्ड तिरोडा या घटनेमुळे संपूर्ण शहरात शोकाकुल वातावरण पसरलेला आहे. सायंकाळचे वेळी मोबाईल चार्जिंगला लावत असताना मृतक नरेश बरईकर यांना जोरदार विद्युत शॉक लागल्याने ते गारद झाल्याचे पाहताच त्यांचा मुलगा दुर्गेश याने बचावासाठी प्रयत्न केले मात्र तोही विद्युत शॉक च्या संपर्कात असल्याचे लक्षात येताच परिसरातील शेजाऱ्यांनी लाकडी काठीने त्यांना विद्युत तारेपासून विभक्त केले, मात्र तोपर्यंत वेळ निघून गेला होता.
लगेच शेजरांच्या सहकार्याने त्या दोघांना तातडीने उपजिल्हा रुग्णालय तिरोडा येथे हलविण्यात आले मात्र तेथील डॉक्टरांनी तपासून दोघेही मृत झाल्याचे माहिती दिली. यावरून मोबाईल हाताळण्याची संवेदनशीलता व त्याचे गांभीर्य ओळखणे किंवा त्याबाबत जनजागृती करणे याबाबत नागरिकांनी सजगता बाळगत गंभीर काळजी घेणे अपेक्षित आहे तसेच प्रशासनाने याची विशेष दखल घेण्याची गरज आहे. असा सूर जनतेतून उमटू लागलेला आहे.
