६० मंडळाचे दालन खुले : रसिकांची मोठ्या प्रमाणात बुकिंग सुरू
प्रा. मुन्नाभाई नंदागवळी बाराभाटी/अ. मोर : – झाडीपट्टी रंगभूमीच्या नाट्य प्रयोगासाठी जवळपास ६० नाट्य कंपन्या सज्ज झाल्या असून या कंपन्यांनी देसाईगंज (वडसा) येथे बुकिंगसाठी आपले कार्यालय सुरू केले आहे. दिवाळीपासून वा पूर्व संध्यापासून ग्रामीण भागात झाडीपट्टीच्या नाट्य प्रयोगाची धूम सुरू झालेली आहे. एका नाट्य प्रयोगाला ६० ते ७० हजार रूपये नाट्य मंडळ आकारुन सादरीकरण करतात. यंदाच्या हंगामाचा नाट्य प्रयोगाचा झाडीपट्टी रंगभूमीचा गावगाड्यात धूमधडाका सुरु झाला. आता परराज्यात नाटकांचा डंका गाजतो आहे.
झाडीपट्टी रंगभूमीचे जन्मदाता माहेरघर म्हणून वडसा ओळखले जाते आहे. पूर्व विदर्भातील पाच जिल्ह्यातील कलाकारांनी वडसा येथे विविध कंपन्यांनी दरवर्षीप्रमाणे नाट्यप्रयोग सादरीकरणासाठी तयारी पूर्ण केली आहे. अखिल झाडीपट्टी नाट्य विकास मंडळ व्यावसायिक नाटक सादर करणाऱ्या ६० कंपन्यांनी नोंदणी केली आहे. दिवाळीपासून ते मार्च अखेर महिन्यांच्या कालावधीत नाट्यप्रयोग ग्रामीण भागात सादर केले जातात. गडचिरोली, चंद्रपूर, भंडारा, गोंदिया या चार जिल्ह्यांसह पुर्व विदर्भात झाडीपट्टीचे नाट्य प्रयोग सादर होत असतात.
हजारो कलावंतांना मिळतो हंगामी रोजगार
झाडीपट्टी रंगभूमीच्या ६० नाटक कंपन्यांमध्ये अनेक कलाकार, कामगार, वादक व इतर घटकांचा समावेश आहे. सर्व घटक मिळून अंदाजे तीन हजार जणांना सदर कालावधीत हंगामी रोजगार उपलब्ध होतो. ६०५ कंपन्यांमध्ये स्त्री व पुरूष मिळून १००० कलावंत आहेत. एका नाट्य कंपनीत १५ कलावंतांचा संच साधारणपणे असताो.
नावीन्यपूर्ण सामाजिक प्रयोग होणार सादर
झाडीपट्टी रंगभूमीवरील नाट्य लेखक, निर्माते, कवी गीतकार व दिग्दर्शक दरवर्षी नावीन्यपुर्ण प्रयाेग सादर करून प्रेक्षकांची शाब्बासकी मिळविण्याचा प्रयत्न करतात. गाजलेल्या जुन्या नाटकाला रसिकांची पसंती तर मिळतेच. मात्र वेगळ्या विषयाचे नावीन्यपूर्ण प्रयाेगालाही प्रेक्षक भरभरून दाद देतात. झाडीपट्टी रंगभूमीवर नावाजलेल्या कंपन्यांची चांगलीच कमाई होत असते.
झाडीपट्टी रंगभूमीची परराज्यात प्रयोग
झाडीपट्टी रंगभूमीचे नाट्यप्रयोग पुर्वी पुर्व विदर्भाच्या चारच जिल्ह्यात व्हायचे. मात्र आता या रंगभूमीने गेल्या दोन वर्षापासून या चार जिल्ह्यांच्या सिमा ओलांडल्या आहेत. नाटकाचा हा सिझन दिवाळीपासून सुरू होतो आणि होळीपर्यंत चालतो. या कालावधीत झाडीपट्टीत समावेश असलेल्या चंद्रपूर, भंडारा, गडचिरोली व गोंदिया या जिल्ह्यातील प्रत्येक गावात नाटकांचे आयोजन होत असते. आता तर नागपूर व वर्धा जिल्ह्यातही नाटकांचे आयोजन सुरू झाले असल्याची माहिती आहे. तसेच मध्य प्रदेश व छत्तीसगड राज्यातही सादर करत आहेत.
