तिरोडा/गोंदिया :- राज्यात सर्वदूर नगरपरिषद तथा नगरपंचायतीच्या निवडणुका सुरू असल्यामुळे या निवडणुका सुरळीतपणे पार पाडण्यासाठी प्रशासनातील अनेक अधिकारी कर्मचाऱ्यांचा सहभाग हा महत्त्वाचा असतो, मात्र या दरम्यान इतर शासकीय कामे थांबू नयेत याचा सुद्धा भान संबंधित कर्मचारी व अधिकाऱ्यांना ठेवणे तितकेच गरजेचे असते. या निवडणुकीत काही विशिष्ट अधिकारी कर्मचाऱ्यांची नियुक्ती होते, मात्र या निवडणुकीच्या नावे अनेक ठिकाणची कार्यालय हे बेजबाबदारपणे वाऱ्यावर असल्यासारखे असल्याचे चित्र पुढे आले आहे. सदर प्रकरण तिरोडा तालुक्यातील मुंडीकोटा येथील तलाठी तसेच मंडळ अधिकारी कार्यालयावर निदर्शनास आलेले आहे.
या ठिकाणी फेरफार च्या कामासाठी मोहाडी जिल्हा भंडारा येथून एक दांपत्याने या काळात पाच वेळा या कार्यालयाला भेट दिली, तरी संबंधित अधिकारी कर्मचारी यांची भेट होत नसून उपस्थित कोतवालाने “साहेब निवडणुकीच्या कामात व्यस्त आहेत” असे सांगून हात झटकले. विशेष म्हणजे यातील महिला गरोदर असल्याने या काळात लांबचा प्रवास किती महागाचा ठरू शकतो हे न सांगितलेलेच बरे..! तरीदेखील सदर दांपत्य अनेकदा त्या कार्यालयास भेट देत असल्याने त्या कामाची गंभीरता ओळखता येऊ शकते. त्यांच्या सहित इतरही अनेक शेतकऱ्यांनी प्रशासनाच्या भोंगळ कारभाराविषयी नाराजी दाखवत आपल्या व्यथा मांडल्या. एकीकडे शासकीय नोकऱ्यांसाठी लाखो विद्यार्थी प्रयत्न करतात त्यांचे भले होत नाही तर दुसरीकडे मात्र असे चित्र..!
याविषयी तहसील कार्यालय तिरोडा येथे चौकशी केली असता सदर अधिकारी कर्मचाऱ्यांना निवडणुकीत कर्तव्यावर ठेवण्यात आले नाही अशी माहिती तेथील अधिकाऱ्यांनी दिली. या प्रकरणावरून संबंधित अधिकारी कर्मचारी निवडणुकीच्या नावे सामान्य जनतेची कशी दिशाभूल करत आहेत याचे उत्तम उदाहरण यापेक्षा तरी कोणते असणार? या प्रकरणी वरिष्ठ अधिकारी कोणते पाऊल उचलते याकडे सामान्य जनतेचे लक्ष लागले आहे.
