गोंदिया :- जिल्ह्यातील गोळीबार कांड म्हणून प्रसिद्ध असलेल्या केस क्रमांक 103/2016 व अप क्र.159/2016 या गुन्ह्याच्या अखेर नऊ वर्षानंतर 18 नोव्हेंबर 2025 रोजी निकाल लागला व जिल्हा व सत्र न्यायाधीश DJ -1 यांच्या न्यायालयाने आरोपींना दहा वर्षाच करावास तसेच पाच लाख रुपये दंडाची शिक्षा सुनावली आहे.
या प्रकरणी गुन्हेगार जुल्फे कार जब्बार गणी राहणार न्यू लक्ष्मी नगर गोंदिया सहित आठ आरोपी यांनी मिळून दिनांक 9 सप्टेंबर 2016 रोजी रात्री अकरा वाजे दरम्यान तेढवा गावातील तरुण मुलांचा कबड्डीचा खेळ सुरू असताना फिर्यादी सार्वजनिक गणपती समोर बसलेला होता. खेळ संपल्यानंतर काही लोक आपल्या घरी निघून गेले व पंधरा ते वीस मुले त्याच ठिकाणी होते तेव्हा एक ट्रॅक्टर भरधाव वेगाने जातानी दिसला. त्यास मुलांनी थांबविण्यास लावले असता चालकाने वाद घालण्यास सुरुवात केली व कॉल करून आपल्या सहकारी इसमांना बोलावले तेव्हा आठ ते नऊ लोक होते. त्यांच्याजवळ असलेली लोखंडी तलवार व पिस्तोल काढून दमदाटी करू लागले व जीवे मारण्याची धमकी दिली. आरोपीने पिस्तोल ताणून फिर्यादी व इतर लोकांना जीवे मारण्याचा प्रयत्न केला असे फिर्यादीच्या तोंडी रिपोर्ट वरून गुन्हा नोंद करण्यात आला होता.
दाखल झालेल्या गुन्ह्याच्या आधारे तत्काळ कारवाई करत आरोपींकडे उपलब्ध असलेल्या शस्त्र जप्ती करत तत्कालीन उपविभागीय पोलीस अधिकारी रमेश बरकते व पोलीस निरीक्षक संजीव गावडे यांनी मिळून आरोपींना अटक करून न्यायालयीन प्रक्रिया पार पाडली. तसेच या गुन्ह्याचा पुढील तपास करत असताना जिल्हा पोलीस अधीक्षक गोरख भामरे यांच्या मार्गदर्शनात, अप्पर पोलीस अधीक्षक अभय डोंगरे यांचे नेतृत्वात, उपविभागीय पोलीस अधिकारी रोहिणी बानकर तसेच रावणवाडी पोलीस स्टेशनचे पोलीस निरीक्षक वैभव पवार यांच्या सहित पैरवी अमलदार यादवराव कुर्वे व चमुने कोर्टाने दिलेल्या आदेशाची तंतोतंत अमलबजावणी करत कोर्टाचा अंतिम निकाल येईपर्यंत सातत्यपूर्ण कामगिरी बजावली. या प्रकरणी सरकारी वकील म्हणून एडवोकेट वसंत चुटे यांनी काम पाहिले.
