गोंदिया :- आदिवासी समाजाच्या आरक्षणात इतर समाजाकडून होणारी घुसखोरी रोखण्यासाठी गोंदिया येथे (दि. 6 ऑक्टोबर) रोजी आक्रोश मोर्चाचे आयोजन करण्यात आले आहे. संयुक्त आदिवासी कृती समिती गोंदिया व विविध आदिवासी संघटनाच्या नेतृत्वात हा मोर्चा इंदिरा गांधी स्टेडियम ते जिल्हाधिकारी कार्यालया पर्यंत काढण्यात येणार आहे.
आदिवासी आक्रोश मोर्चाला काँग्रेस पक्षाचे जिल्हाध्यक्ष दिलीप बनसोड, राष्ट्रवादी काँग्रेस (शरद पवार गट) पक्षाचे जिल्हाध्यक्ष सौरभ रोकडे तसेच वंचित बहुजन आघाडीचे सुद्धा जाहीर समर्थन असल्याची माहिती देण्यात आली आहे. आदिवासी समाजाच्या आरक्षणावर बंजारा आणि धनगर समाजाकडून हैदराबाद गॅजेटच्या आधारावर दावा केला जात आहे. या दोन्ही समाजांना स्वतंत्र आरक्षण असताना ते आदिवासी समाजात समाविष्ट होऊन आरक्षण मिळवण्याचा प्रयत्न करत असल्याचा आरोप संयुक्त आदिवासी कृती समितीने केला आहे.
बंजारा आणि धनगर समाज आदिवासींचे निकष पूर्ण करत नसून त्यांना आदिवासी आरक्षणात समाविष्ट करणे संविधानाच्या विरोधात आहे असे समितीचे म्हणणे आहे. बंजारा व धनगर समाजाला यात समाविष्ट केले तर मूळ आदिवासींच्या हक्क अधिकारावर गदा येईल अशी संभावना समितीने व्यक्त केली. या मोर्चात विविध संघटनांचे पन्नास हजार पेक्षा अधिक च्या संख्येने आदिवासी बांधव उपस्थित राहणार असल्याची माहिती आयोजकांनी दिली.
प्रमुख मागण्या-
बंजारा धनगर व इतर कोणत्याही जाती समूहाला अनुसूचित जाती प्रवर्गात समाविष्ट करण्यात येऊ नये. राज्यातील अनुसूचित जातीच्या अनुशेष तात्काळ भरण्यात यावा. आदिवासी वस्तीगृहातील विद्यार्थ्यांना दिली जाणारी डीबीटी योजना बंद करून शासकीय खानावळ सुरू करण्यात यावे. आदिवासींच्या जमिनी गैर आदिवासींना भाडेतत्त्वावर देण्यात येऊ नये. शैक्षणिक व इतर क्षेत्रांमध्ये जात वैधता प्रमाणपत्राशिवाय कोणतेही लाभ देण्यात येऊ नये या सारख्या अनेक मागण्यांचे समावेश आहे.
